Сказ пра тое, як адзiн адмiн хакера злавiў
(Based on real events)

Жыў-быў адзiн Адмiн. Адмiнiў сабе сеткi розныя, ды ўсё марыў злавiць Злога Кульхацкера. Ставiў на iх усялякiя пасткi, гаршкi мядовыя й iншую лухту. Й называў сябе Крутым Адмiнам. Але нiводнага Кульхацкера ня тое што не злавiў, але нават у логах ня бачыў.

Паехаў той Круты Адмiн у госьцi да дзяўчыны. Прыехаў i думае - трэба паглядзець, як там мой форум, можа завалiлi яго Злыя Кульхацкеры, закатавалi доўгiмi пiнгамi? Зайшоў на форум, залягiнiўся ды на аўтамаце паставiў птушачку там, дзе было напiсана "Always stay logged in". Паглядзеў на форум - не, Злыя Кульхацкеры сьпяць, нават блiзка да форума не падыходзяць, баяцца крутасьцi Адмiна. Выключыў кампутар ды й пайшоў спаць.

Наступным днём паехаў ён дадому, а дзеўчына вырашыла на той самы форум схадзiць. Заходзiць, а там напiсана: "Добрай ранiцы, Круты Адмiн!" Узрадавалася дзеўка ды й жартаваць пачала. Малюначак яму зьмянiла - замест крутога аватара нейкае сьмешнае кацянятка паставiла. Прыватных паведамленьняў ад яго ймя напiсала сотнi тры, ды ўсе нейкiя вар'яцкiя. Карацей кажучы, адцягнулася як трэба.

Заходзiць Круты Адмiн на форум , а там кацянятка мяўчыць, сябры адказы пiшуць, адным словам - усё гарыць-дымiцца. Стаў ён тое кацянятка гнаць з форуму, а яно лужыцу напрудзiла, засела ў куточак й не выходзiць. Тады зразумеў Круты Адмiн, што напалi на яго Злыя Кульхацкеры, i стаў зь iх высьлежваць. Адлавiў IP адрас, навесiў блёк, выставiў MOTD - "вiншую мяне зь першым Кульхацкерам. IP iдыёта вядомы, меры прыймаюцца" i пайщоў пiва пiць. Дапiў, прыходзiць, а дзяўчына яму мыла напiсала - "Хам! Нягоднiк! Гэта ты? Мяне? Назваў iдыётам? Ды яшчэ й заблякаваў?"

Зразумеў усё Круты Адмiн, зьняў блёк i даслаў ёй вялiзарны букет чырвоных ружаў. Гiф ажна пад мег пацягнуў, але што рабiць? А ў ханi поце нiякага мёду не засталося, усё трутнi пад'елi.